ҚЗ  /  РУ  /  EN
  
   Биыл қаңтардың 31 жұлдызында «Арыстан» мамандандырылған лицейінің еңсесі биік салтанат залында ұлы Абайдың 175 жылдық мерейтойына арналған «Абайды оқы, таңырқа...» атты кеш қазақ тілінің мұғалімі Шоранова Гүлдария Әжіғұлқызының ұйымдастыруымен жоғарғы деңгейде өткізілді. Шараның басты мақсаты – өскелең ұрпаққа тағылым ретінде Абайдың рухына тағзым ету, Абайдың рухани құндылықтарын көрсете отырып, ұлы ақынның мұрасын жастардың санасына сіңіру.
   Бұл кеште лицей оқушылары жазушы М. Әуезовтың «Абай жолы» эпопеясын негізге алып, жас Абайдан бастап кемелденген Абайға дейінгі бейнесін рөлде ойнап, Абай өмірінің кезеңдерін беруге тырысты. Кеш негізінен шығарма бойынша ақынның ең негізгі сәттерін бейнелейтін төрт қойылымнан тұрады. 11-сынып лицеисі Назарбек Елдар мен 10-сынып лицеисі Бағдатұлы Заңғар Құнанбай мен бала Абай арасындағы атақты әке сыны мен жауаптары айтылған диалогты әсерлі ойнай білді. Абайдың жігіттік албырт шағын және досы Ерболды 11-сынып лицеистері Қабимолла Шерхан мен Рысбай Мадияр сомдады. Ал Абайдың шығармашылықпен айналысқан кемелденген шағын 10-сынып лицеисі Абдукахаров Нұртаза рөлді шеберлікпен ойнап, залда отырған көрермендерге Абай жанын, табиғатын жеткізе білді. Осы кеште 10-11-сынып лицеистері Азаматұлы Баймырза, Атбакиев Шахмұрат, Қабимолла Шерхан, Рысбай Мадияр шырқата салған Абайдың «Айттым сәлем, қаламқас» әні көрермен көңілінен шықты.

   Кеш соңында ақынның «Көзімнің қарасы» атты әнін барлық лицеистер орнынан тұрып, ақынға құрмет көрсетіп тебірене орындады. Сонымен қатар қазақ тілі пәні мұғалімдері Умерджанова Жанар Тоқтарбайқызы, Салимова Несіпкүл Төлегенқызы кештің өтуіне белсенділік көрсетсе, Исабекова Жұлдыз Абайәліқызы «Абай қазынасына жол» атты лицей оқушыларына арналған, оқуға ыңғайлы шағын кітапшасымен таныстырып, оларды Абай шығармаларын жақсы меңгеруге, санасына сіңіруге, одан тағылым алуға үндеді. Кеш соңында Лицей басшысының тәрбие-ісі жөніндегі орынбасары Владимир Анатольевич Райхель ұлы Абайдың мерейтойымен құттықтай отыра, қойылымда өнер көрсеткен лицеистердің өнерін жоғары бағалады.


Қазақ тілі мен әдебиеті пәні мұғалімі Шоранова Г.А.